Djaweps merdia direktiva di 60+ Kurason Kontentu a akudí na ofisina di notario Aniek Schouten pa firma akta di statuto di nan fundashon.

E direktiva den persona di Erica Mercera, presidente, Jumira Goeloe sekretatia i Rudolf Wout, tesorero a firma e akta huntu ku e notario. E fundashon su meta ta pa promové desaroyo sosial ekonomiko di personanan riba 60 aña na Boneiru i pa traha huntu ku otro gruponan òf organisashonnan ku ta traha pa hende grandi na Boneiru i den eksterior. E fundashon ta trata na realisá su meta ku koperashon di otro gruponan similar, organisá seminario, tayer, enkuentro, treining i aktividatnan sosial kultural. Tambe e fundashon lo trata na traha den koperashon ku institutonan i organisashonnan ku ta traha na bienestar di e hende grandi pa yega na su meta. Pa mas informashon por sigui e fundashon riba nan pagina di Facebook Kurason Kontentu 60+, of riba e wèpsait di e plataforma pa grandinan di Boneiru www.plasaadulto.com i klek riba Kurason Kontentu Rincon.